రన్నింగ్‌ చేస్తుండగా గుండెపోటు.. గ్రౌండ్‌లోనే కుప్పకూలిన యువకుడు

తన కలను నిజం చేసుకోవాలనే ప్రయత్నంలోనే ఓ యువకుడు కన్నుమూశాడు. ఎస్సై కావాలనే కోరికతో ఫిజికల్‌ టెస్టు కోసం ప్రాక్టీస్‌ చేస్తున్న యువకుడు అకస్మాత్తుగా గుండెపోటుతో మృతిచెందాడు. ఈ విషాద ఘటన సూర్యాపేట జిల్లా కేంద్రంలో మంగళవారం జరిగింది. సూర్యాపేట జిల్లా కేంద్రంలోని ఇందిరమ్మ కాలనీకి చెందిన సమర్తపు లక్ష్మయ్య కుమారుడు శ్రీకాంత్‌ ఎస్సై ప్రిలిమినరీ పరీక్షలో అర్హత సాధించాడు.నంతరం నిర్వహించే దేహదారుఢ్య పరీక్షల కోసం సూర్యాపేటలోని వేంకటేశ్వర డిగ్రీ కాలేజీలో ప్రతిరోజూ మిత్రులతో కలిసి రన్నింగ్‌ ప్రాక్టీస్‌ చేస్తున్నాడు. మంగళవారం ఉదయం కూడా రన్నింగ్‌ చేస్తుండగా ఒక్కసారిగా కుప్పకూలాడు. గమనించిన మిత్రులు వెంటనే సూర్యాపేట జిల్లా దవాఖానకు తరలించగా అప్పటికే మృతి చెందినట్టు వైద్యులు తెలిపారు. ఎస్సై అవుతాడనుకున్న కొడుకు.. శవంగా మారాడని ఆ తల్లిదండ్రుల రోదన ఆకాశన్నంటుతోంది